Երևանի Տ. Շևչենկոյի անվան թիվ 42 ավագ դպրոցը հիմնադրվել է 1943 թվականին և գտնվել է Կոնդ թաղամասի տարածքում: 1953 թվականին այն տեղակայվել է Երևանի սրտում՝ Մաշտոցի 5/2 հասցեում, թամանյանական ոճով կառուցված շենքում:

Սկզբնական շրջանում դպրոցը եղել է ռուսական միջնակարգ դպրոց, 2010 թվականից դպրոցը ստացել է նոր կարգավիճակ՝ վերանվանվելով Երևանի Տ. Շևչենկոյի անվան թիվ 42 ավագ դպրոց:

2011 թվականից դպրոցի տնօրենն է ՀՀ վաստակավոր մանկավարժ, Երևան քաղաքի պատվավոր մանկավարժ Էլեոնորա Թումանյանը, ով մարդկային հարաբերությունների մեծ գիտակ է, արժևորում է  բարոյահոգեբանական մթնոլորտը, մեծ  ուշադրություն  է դարձնում աշակերտների հոգեկերտությանն ու ապագա քաղաքացու կայացմանը, ակտիվորեն համագործակցում է ծնողական հասարակայնության և համայնքի հետ` ապահովելով վերջիններիս տեղեկացվածությունն ու ներգրավվածությունը արտադպրոցական նախաձեռնություններում:

2014 թվականին ուկրաինացի մեծանուն գրող, նկարիչ Տարաս Շևչենկոյի ծննդյան 200 ամյակին ընդառաջ դպրոցում հիմնադրվել է նրա անունը կրող դահլիճ- թանգարան:

Դպրոցը տվել է բազում անվանի շրջանավարտներ. նրա առաջին շրջանավարտներից է եղել երգչուհի Լուսինե Զաքարյանը, Թուրքմենիստանի դեսպան Վլադիմիր Բադալյանը, ՀՀ նախկին վարչապետ, Սլավոնական համալսարանի ռեկտոր Արմեն Դարբինյանը, ԻՏԱՌ-ՏԱՍՍ տեղեկատվական գործակալության թղթակից Տիգրան Լիլոյանը և այլոք:

Դպրոցն այսօր էլ իր հյուրընկալ դռներն է բացում նոր աշակերտների առաջ, ովքեր իրենց ժամանակին կհամալրեն դպրոցի անվանի շրջանավարտների շարքերը:

Դպրոցում մեծ տեղ է հատկացվում ժողովրդավարական սկզբունքներին, պահպանվում է ուսուցիչ-աշակերտ-ծնող եռակողմ համագործակցային մթնոլորտը, որի վառ ապացույցն է դպրոցում ավանդույթ դարձած տարեվերջյան հանդիսավոր եռակողմ նիստը,որի ժամանակ ֆիլմաշարի միջոցով ամփոփվում են ուստարվա ընթացքում կատարված դպրոցական և արտադպրոցական միջոցառումներն ու կատարված ուսումնադաստիարակչական աշխատանքները, որի ժամանակ հաջողություններ գրանցած  և տարբեր նախաձեռնություններում  ակտիվություն ցուցաբերած ուսուցիչները, աշակերտներն ու ծնողները պարգևատրվում են տնօրենի կողմից:

Դպրոցում մեծ տեղ է հատկացվում ռազմահայրենասիրական դաստիարակությանն ու հայեցի մտածողության զարգացմանը: Խրախուսվում են հայրենասիրական միջոցառումների կազմակերպումն ու անցկացումը, որոնք միտված են հայրենասիրական ոգու բարձրացմանը, հայրենիք-դպրոց-բանակ հարաբերությունների ամրապնդմանը, հայոց պատմության էջերում տեղ գտած հերոսական անցյալի իմացությանն ու մեր օրերի «Հայրենիքի նվիրյալների» բացահայտմանը:

Ավանդույթ են դարձել ամենամյա հանդիպումները երկրապահների, զինվորականների, արցախյան ազատամարտի հերոսների և Երկրորդ համաշխարհային պատերազմի վետերանների հետ: Դպրոցում գործում է Պատանի երկրապահների ակումբ:

Դպրոցում մեծ կարևորություն է տրվել Հայոց ցեղասպանության 100 ամյակին նվիրված միջոցառումների կազմակերպմանն ու անցկացմանը. երթ դեպի Ծիծեռնակաբերդ, մասնակցություն «Պատվո պահակ» նախաձեռնությանը` ոգեկոչելու Ցեղասպանության զոհերի հիշատակը, պատմագրական կոմպոզիցիաներ: Դպրոցում նաև ստեղծվել է Հայոց ցեղասպանությանը նվիրված սրահ-թանգարան, որտեղ տեղ են գտել     ոչ միայն պատմական, փաստագրական տվյալներ, այլև ստեղծագործություններ, որոնք երեխայի ստեղծագործական մտքի արգասիք են, նրա զգացմունքների ու երևակայության մարմնավորում:

Դպրոցում մեծ տեղ են հատկացվում նաև արտաքին համագործակ-ցություններին:  Արդեն երեք տարի է դպրոցն ակտիվորեն համագործակցում է Հայաստանում «Россотрудничество» Դաշնային գործակալության հետ, որի արդյունքում դպրոցում հաճախակի կազմակերպվում են «Վարպետաց դասեր» և՛ ուսուցիչների, և՛ աշակերտների համար, որոնք անցկացվում են ռուսական հայտնի բուհերի լավագույն դասախոսների կողմից, ինչպես նաև կազմակերպվում են գրական- երաժշտական միջոցառումներ:

Դպրոցը սերտորեն  համագործակցում է Հայաստանում ուկրաինական դեսպանատան հետ, որի արդյունքում ձևավորվել են բարեկամական հարաբերություններ Ուկրաինայի նշանավոր բուհերի ու դպրոցների հետ:

 

Հիմնադրման տարի 1943թ.